shukriyaa hasti kaa lekin tumane ye kyaa kar diyaa
are parde hi parde me apanaa raaz afshaa kar diyaa

maang kar ham laaye the allaah se ek dard-e-ishq
vo bhi ab taqadir ne auro kaa hissaa kar diyaa

do hi agaare the haatho me khudaa-e-ishq ke
ek ko dil ek ko meraa kalejaa kar diyaa

mai to apani bekhudi-e-shauq ka mamanun hun
baarahaa mujh ko bhari mahafil me tanhaa kar diyaa

marahamat faramaa ke ai simaab gam ki lazzate
zist ki talkhi ko fitarat ne gavaaraa kar diyaa